Ibandla leMthwakazi Republic Party (MRP) lithi kalikhali ngokubhubha kukaMnu Robert Mugabe ngoba ubengumuntu omubi owabulala inkulungwane zabantu beMatabeleland leMidlands ngesikhathi sombuqazwe weGukurahundi.
Lelibandla lithi njalo liyadana ngokuthi uMugabe usedlulile emhlabeni engazange wathonisiswa phezu kwalumbuqazwe.
“Asikhali ngokufa kukaMugabe ngenxa yochuku alwenza phezu kwabantu bakithi abedlula i20, 000 ababulala ngeGukurahundi bengelacala,” kutsho umkhokheli weMRP uMnu Mqondisi Moyo.
“Akuphelelanga kuGukurahundi kuphela, sinanzelela ukuthi kuze kufike namhlanje abantu beMatabeleland bayahlupheka kakhulu ngokubhidlika komnotho ngenxa kaMugabe.”
UMnu Moyo wengeze wathi bebelesifiso sokubona uMugabe ebotshwa phezu kweGukurahundi njalo egwetshwa ukuze abantu ababulawelwa izihlobo libutho lakhe leFifth Brigade bathole ukuhlaliseka.
“Besifisela ukuthi ngabe uMugabe uphilile sambophisa kuICC (International Criminal Court) njalo waphila wabona sithatha ilizwe lethu leMthwakazi siphuma eZimbabwe. Besifisa ukuthi uMugabe aphile akubone lokho,” kutsho uMoyo ekhuluma lomsakazo weStudio 7.
