Ibandla leMDC-T lithi uMnu Robert Mugabe uzakhunjulwa ngabantu abanengi ngemisebenzi emini, ikakhulu ukubhidliza umnotho lokubulala abantu ngeGukurahundi.
“Bayakhala abangabangane bakhe lezihlobo zakhe kodwa abanengi ikakhulu eMatabeleland kabasoze bazihluphe ngoba wabulala abantu abanengi,” kutsho umgcinisihlalo walelibandla uMnu Abednico Bhebhe.
Lanxa abanye besithi ngaphandle kwemisebenzi yakhe emini, uMugabe kumele atshayelwe ihlombe ngokwabela abansundu amapulazi awahluthunela abalimi abamhlophe, uBhebhe uthi kavumelani lalumbono.
“UMugabe anganconywa ngakho nje yikuthi waba ngomunye wabantu abakhulula ilizwe. Kuthe kusuka khonapho akulalutho alwenzayo,” kutsho uMnu Bhebhe.
“Konke esikubonayo lomnotho abakhuluma ngawo usubhidlikile. Lamalupazi awanika abantu kawaphumisi lutho siyafa ngendlela ngoba amapulazi lawo asezandleni zabantu abangawusebenzisiyo. Ngakho, angiboni ukuthi yinto esingambuka ngayo eyo.”
