Inengi lamukele ngembono etshiyeneyo isinqumo seMDC esokuthi ibandla leli alisaqhubi umcimbi walo ngoMgqibelo ekupheleni kwayonale inyanga, ngendlela yokuhlonipha owayengumongameli welizwe uMnu. Robert Mugabe, otshone ngeviki edluleyo.
Abanye bathi lokhu kuzabangela ukufuthelana ebandleni leli elasungulwa ngokuthi kususwe uMugabe esihlalweni.
Ibandla leMDC belimele libelomcimbi enkundleni yeRufaro Stadium, owokunanza iminyaka engamatshumi amabili selokhu labunjwayo.
Ekhuluma lentathelizindaba ngoLwesibili, umkhokheli weMDC uMnu. Nelson Chamisa uthe umufi uMnu. Mugabe wayesezimisele ukuba lilunga lebandla lakhe engakatshoni.
Uthe inyathelo abalithetheyo litshengisa ubuntu ngoba lanxa babengavumelani loMnu. Mugabe, abasoze baphindizele ngenzondo.
Asizweni umbono kaMnu. Max Mnkandla, ingcwethi ecubungula ezombusazwe exoxa loSithandekile Mhlanga weStudio 7 ngaloludaba.
