amalinks wokungena

Breaking News

Abokuza eSouth Africa Abatshiselwa Izindlu Sebeyimhambume


Izizalwane zeNigeria sezilubhekisa ekhaya zibalekela udlakela eSouth Africa.
Izizalwane zeNigeria sezilubhekisa ekhaya zibalekela udlakela eSouth Africa.

Udlakela lwezokucwasana ngobuzwe kweleSouth Africa selutshiye amakhulu abantu bokuza, kugoqela lezizalwane zeZimbabwe, sebeyimihambuma.

Bekulomsindo wokuhlabela ohlangabezana lawo emnyango nxa ungena eholwini yeTsolo elokitshini leKatlehong edolobheni le Kurhuleni elingcelelane leJohannesburg.

Liholu igcwele phamu ngabantu labantwababo ababalekele udlakela lwexenophobia elokitshini lemikhukhu yaseMandela Mandela.

Unkosazana Polite Moyo oleminyaka engamatshumi amahlanu labantwana abathathu ngomunye wabeZimbabwe abaphose bafike ikhulu abahlala kule iholu. Uthi ngeviki eyandulele le ephelileyo izakhamuzi zakhwele South Africa kuleli lokitshi zivuke eseganga ngovivi zabathanyela okwengcekeza.

“Bathi silinika only 3 hours libe lingasekho la. Bathi ngo 10 siyangena door to door, wonke umuntu wangaphandle akaphume. Sabaleka saya epolice station. Sithe sikhonangale epolice station sabona sekubambe intuthu sekutshiswa impahla zethu. Kunzima ukuthi uyazilanda njani impahla zakhona. Zitshisiwe 1, second abafuni muntu ohambela esayidini yabo,” kutsho uMoyo.

Lokhu uthi sekubaphendule baba yiziceli zokucina.

“Asilamali asilalutho. Siyithinje. Siphumenje simsulwa. Kwakudla kwani. Okokuthi lanxa sicabanga ukuya ekhaya, uyazibuza ukuthi uqalisa ngaphi. Konke imbiza, imiganu yonke into yethu lamankomitsho konke kufele khonapha, lapha akade sihlezi khona,” kutsho uMoyo.

Laphake kule iholu balala beqamele imikungulu yabo, omama kwelinye icele obaba labo kwelinye. Badlela, lapho, betshone lapho, kanti labantwana badlalela lapho.

“Uyazi ukuthi istress engilaso nxa ngicabanga ngeproperty yami, enye bengingakayisebenzisi bekuyiproperty ebisanda ukuthengwa ibekiwe. Kungilimaza kakhulu ngaphakathi kwami ngicabanga ukuthi yonaleyo mali yokuthi ngiphinde ngikudinge khonalokhu ekade sengikudingile ngizayithathangaphi? Angisebenzi bengisenza okokuthengisanje ngizithengisela amavegetables ngenze okungumsika, batshisile konke angisalanga lanhex,” kutsho uMoyo.

Umnumnzana Isaac Sithole Mabandla ngomunye wabalitshumi lambili abalahlekelwe zimpilo zabo kulokhu kuhlasela. Yenake kwathi ngemva kokuhlaselwa ebusuku belele, wathi ezama ukubaleka bambamba, bamkhanda ngamatshe lezigodo, bamtshisa waze wafa.

Umfowabo umnumnzana Langton Sitole Mabandla, uthi lesi sehlakalo sibatshiye bezondile, bedanile, benhliziyo zivuza igazi kodwa usizi yikuthi akuselanto abangayenza ngaphandle kokuyangcwaba umfowabo ekhaya.

“Ukufa ukhandwa loba utshiswa kubuhlungu okokuthi lawe ufa usuzwile. Kubuhlungu kakhulu kimi ngoba imuli yakhe isisalele mina,” kutsho uSithole.

Ngenxa yalokhu kuhlasela, amakhulu ezizalwane zakwamanye amazwe asebhalisele ukubuyela emazweni abo. AbeZimbabwe abedlula amatshumi ayisithupha, abeMalawi abedlula ikhulu labeNigeria abedlula amakhulu ayisithupha, bayingxenye yamaqula aphakathi kokubuyela emazweni abo.

Uhulumende waseNigerian useqalile ukuphindisela izizalwane zakhe emuva.

Isizalwane sekwaleNigeria okhethe ukwaziwa ngokuthi ngumnumnzana Nicholas, ngomunye wabebekuqula lakuqala.

Kutsho uNicholas: “Kungcono ngiyefela elizweni lami kulokufela lapha sengathi aziphelelanga ekhanda. Ngilahlekelwe zimota zami lebhizimusi lami. Ngilahlekelwe yikho konke.”

Inengike labeZimbabwe bathi njengoba isimo ekhaya sesisibi okwedlulise amalawulo, bazahlala balinde loba yini ebuyayo ngoba bengabuyela ekhaya lakho bazacina befile ngendlala.

please wait

No media source currently available

0:00 0:03:43 0:00


XS
SM
MD
LG