Intengo yokudla ebalisa isinkwa, amafutha okupheka, impuphu, inyama, imbhida, lenkukhu ibikwa ikhuphuke ngesilinganiso esiphezulu okuphindwe phose kabili kuyonale iviki nje kuphela.
Isiphathamandla senhlanganiso elwela ilungelo lezisebenzi, uMnu. Ambrose Sibindi, njalo ongumgcinisihlalo wenhlanganiso elwela ilungelo lezakhamizi, eye Progressive Resindents' Association, uthi lokhu kuzabangela ukuthi abantu becine bengasayi emsebenzini.
Lokhu kwenzakala uhulumende ekhangelelwe ukwethula umbiko wokusetshenziswa kwemali, owe Monetory Policy kunsukwana ezilandelayo, ngesikhathi idola leZimbabwe lilokhu lisiwa amandla nxa liqathaniswa leleMelika.
Ukucubungula loludaba, uSithandekile Mhlanga weStudio 7 uxoxe loMnu. Ambrose Sibindi isiphathamandla senhlanganiso yeBulawayo Progressive Residents Association kanye leye ZCTU.
USibindi uthi ngexa yomumo okhona abantu bazacina bebanjwa ngamandla yindlalo ukuthi bezingenele emgwaqweni betshengisela kungelamuntu obaqoqileyo.
"Umumo lo esiwubonayo izinto zizazenza ngoba uhulumende nxa engananzelelanga sizabona izinto ezesabekayo khonapha abantu sebezenzela abakucabangayo," kutsho uSibindi.
