Ukusilela kwemali yephepha sokufike kusibanga esibi ngesikhathi abanye osomabhizimusi bebhadalisa umthelo omkhulu kulabo abathenga ngemali kamakhalekhukwini.
Ilizwe libhekane lobunzima bokusilela kwemali kulandela ukususwa kokusetshenziswa kwemali yakwamanye amazwe lanxa abanye osomabhizimusi bayemukela idola leMelika le Rand le South Africa okungaphandle komthetho.
Osiphatheleni labo babikwa bebhadalisa umthelo nxa umuntu efuna imali uqobo lwayo hatshi ekamakhalekhukwini osokwenza ubunzima obukhona buphindwe kabili.
Ukhanisla wedolobho le Victoria Falls, uMnu. Ephias Mambume uthi kulodubo elizweni ngokusilela kwemali.
Umkhokheli wenhlanganiso yabosomabhizimusi abaphila ngokuthenga bethengisa, eye Bulawayo Vendors and Traders Association, uMnu. Michael Ndiweni uthi isisindo semali sehle kakhulu kumalanga amalutshwana asand kwedlula.
Ingcwethi ecubungula ezomnotho, uMnu. Masimba Kuchera uthi lanxa imali ingatholakali emabhanga emkambo wensitha iyatholakala kodwa isifakelwe umthelo.
Umphathintambo wezemali, uMnu. Mthuli Ncube usanda yethula umbiko othi ukwehla kwesisindo sedale leZimbabwe kubangelwa yikuthi umkambo wegwayi elitholisa ilizwe imali yakwamanye amazwe usanda valwa. Kodwa ingcwethi kwezomnotho, uKuchera uyakulandula lokhu.
Idola leMelika selithengwa ngama bond alitshumi lasithupha emkambo wensitha osezitaladeni.
