Inhlanganiso yeAmalgamated Rural Teachers’ Union of Zimbabwe leyeProgressive Teachers’ Union of Zimbabwe zithi zizabambana labezempilakahle ekukhalaleni umsebenzi kusasa zikhonona phezu kokuthunjwa komkhokheli wabodokotela uMnu Peter Magombeyi.
Embikweni eziwethule izolo, inhlanganiso zombili zikhuthaze abafundi ukuthi labo bengayi esikolo. Zithi njalo kusasa kumele kube lilanga lokuthandazela ukuthi uMagombeyi etholakale ephila.
UDokotela Magombeyi uthunjwe ngabantu ababehlomile ngoMgqibelo. Lanamuhla lokhu akwaziwa ukuthi ungaphi lokuthi uyaphila na.
Abanye bathi udokotela Magombeyi uthunjwe ngabantu abasebenzela uhulumende lanxa nje yena ekulandula lokhu.
Ukutshengisela phezu kwaloludaba sokufinyelele lasemazweni aphatsheya. Umgcinisihlalo webandla leMDC kweleBhilithani, uMnu Thokozani Maya uthi bazatshengisela ngempelaviki.