Umnotho welizwe uqhubeka usiya ngenxele ngesiqubu lanxa uMongameli Mnangagwa esithi uhulumende wakhe uthethe amanyathelo alukhuni okulungisisa umnotho.
Intengo ezitolo lokhu ikhuphuka mihla ngemihla ngapha lesisindo sedola leZimbabwe lokhu sisehla nsuku zonke nxa siqathaniswa lesedola leMelika.
Ngeviki edluleyo ugatsha lweze security ebhanga le Reserve Bank lwanquma ukuba amankampani athi Access Finance, Croco Motors, Spartan Security le Sakunda Holdings avalelwe ama account ebhanga. Lelinyathelo, elingconywe nguMongameli Mnangagwa, labangela ukuthi isisindo sedola le Zimbabwe sithuthuke kancane.
Kodwa lokhu akuthathanga sikhathi eside ngoba isisindo lesi sahle saqala njalo ukwehla lentengo yempahla ezitolo layo yathi ukuqansa.
Isakhamuzi seDete, uMnu. Stanley Torima, njalo engakhansila walumango, uthi indlala isifike kusibanga esibi eDete.
Isakhamuzi sako Bulawayo, uMnu. Swithern Chirowodza, oyisikhulumeli sebandla le MDC ko Bulawayo uthi umumo okhona usukhombe ukuba umkhokheli owayevele esehluleka ukuthuthukisa umnotho welizwe nguMnangagwa langesikhathi sika Mugabe.
Ingcwethi ecubungula ezomnotho, uMnu. Rejoice Ngwenya uthi lokhu okuthiwa yimizamo yokulungisisa umnotho welizwe okukhulunywe nguMnangagwa yikuvala uzulu amehlo nje kuphela.
