UMongameli Emmerson Mnangagwa utshele umhlangano weUnted Nations General Assembly ekuseni namuhla ukuthi uhulumende wakhe uselethe umbuso okhululekileyo eZimbabwe.
UMnangagwa ukhale njalo ngezijeziso ezetheswa amalunga eZanu PF ngeleMelika lomanyano weEuropean Union esithi sezilethele uzulu wezimbabwe udubo olumangalisayo.
Njengobekukhangelelwe, uMongameli Mnangagwa usole izijeziso lezi esithi ziphazamisa uzulu makhaza kanye lemizamo kahulumende wakhe yokuvuselela umnotho.
Ngakho, uthe kumele zesulwe ngokuphangisa ukuze elezimbabwe lenelise ukuqhubekela phambili liphume engxakini elikizo.
UMnangagwa uqale ngokukhumbuza abakhokheli bamazwe omhlaba kulumhlangano ngokubhubha kukaMnu Robert Mugabe esithi njengoba enguye oseziphethe esidukwini, uhulumende usehamba ngonyawo olwehlukileyo oluhlonipha umbuso okhululekileyo lentando kazulu.
Uthe kunengi asekwenzile kusukela engena embusweni okugoqela ukwesula imithetho ecindezelayo efana leposa leaippa. Uthe lokhu kutshengisa sobala ukuzimisela kukahulumende wakhe ukuhlonipha amalungelo oluntu.
UMnangagwa uqhubeke esithi uhulumende wakhe uphakathi kokukhulumisana lamabandla aphikisayo emizameni yokugxhilisa umkhuba wokubamba iqhaza lanxa abantu bengaboni ngaso linye njalo bengabamabandla ezombusazwe atshiyeneyo.
UMnangagwa uthe njalo elezimbabwe livulekile kubatshali bezimali abangaba lesifiso sokuzevula amabhizimusi. Unxuse njalo amazwe omhlaba ukuthi asebenzelane lezimbabwe yona athi izimisele ukudlelana yiloba yiliphi ilizwe.
Uthe uhulumede wakhe usebenza gadalala kuhlelo zokuqeda ubuyanga lokuthuthukisa uzulu ngenhleo zempilakahle lezemfundo.
UMongameli Mnangagwa ukhulume kusanda tshaya ihola lesibili ekuseni njalo wethule umbiko wakhe phakathi kwemizuzu elitshumi lasithupha.
Lokhu bekungokwesibili ukuthi uMnangagwa akhulume eUnited Nations njengomongameli weZimbabwe ngemva kokugenqulwa kukaMugabe libutho ngo2017.
Amazwi kaMongameli Mnangagwa yiwo kanye abekhangelelwe ngabanengi. Ukuhlaziya loludaba uChris Gande weStudio Seven uxoxe lengcwethi ecubungula ezombusazwe, uMnu. Calvin Manduna.