UMongameli Emmerson Mnangagwa uzakwethula umbiko wakhe oqondane lesimo selizwe, oweState of the Nation Address (SONA), edale lephalamende ngoLwesibili.
Kodwa ibandla leMDC lithi amalunga alo azatshengisela ngandlelathize njalo kasoze amlalele ngoba engamnanzi uMnangagwa njengoMongameli.
Ibandla leli lithi uMnangagwa waqilibezela kukhetho olwedluleyo.
Esikhathini esedluleyo, amalunga eMDC aseke aphuma edale njalo amhoza uMnangagwa ngesikhathi esethula umbiko ofanayo.
Isikhulumeli salelibandla uMnu Daniel Molokele uthi lanxa besabonisana ukuthi bazatshengisela ngayiphi indlela kusasa, okusobala yikuthi kabasoze bahlale ephalamende balalele uMnangagwa.
Kodwa ilunga leZanu PF uMnu Dingumuzi Phuti, yena omela isigaba seBulilima West edale lephalamende utshele iStudio 7 ukuthi kungaba lihlazo elikhulu alubana amalunga eMDC ethe aphuma edale uMnangagwa esakhuluma.