UMongameli uEmmerson Mnangagwa uthi ukhathazeke kakhulu ngemisebenzi yenkohlakalo athi yenziwa ngabatshintsha izimali ngokungekho emthethweni, bona athi yibo ababhidliza umnotho ngokwehlisa isisindo sedola leZimbabwe nxa iqathaniswa lemali yakwamanye amazwe.
UMnangagwa wethule amazwi la edale lephalamende ngoLwesibili kumbika wakhe oqondane lesimo selizwe, oweState of the Nation Address (SONA).
Amalunga ebandla leMDC aphumile ngesikhathi uMnangagwa engena ephalamende ngoba esithi akamnanzi njengoMongameli weZimbabwe.
“Kulamanyathelo esiwathathayo ukuthi silungisise ukuswelakala kwemali elizweni, agoqela ukususa amathuba okuthengiselana imali,” kutsho Mnangagwa.
Wengeze wathi lanxa umnotho usasebunzimeni, amanyathelo asethethwe nguhulumende wakhe aselethe ububelo obukhulu.
UMongameli Mnangagwa uthe njalo umkhuba wodlakela kanye lokwethuselwa kwabantu eZimbabwe kumele uphele.
Umphathintambo wogatshwa lwamagetsi, uMnu Fortune Chasi utshele iStudio 7 ukuthi wamukele amazwi kaMnangagwa kuhle ngoba ephathe udaba lokusilela kwamagetsi elizweni.
“Sikhangele ukuthi sisiyaphambili senelise ukuthola imali yethu esiyabe siyisebenzisile ekuthengeni amagetsi, iphenduke, kodwa abayanga sifuna labo bengabi lodubo,” kutsho uMnu Chasi.
Lanxa uMnangagwa esithi uhulumende wakhe uselethe ububelo kwezenotho, ingcwethi ehlaziya ezombusazwe uMnu Dumisani Nkomo utshele iStudio 7 ukuthi akula bungcono osobukhona.