Inengi seliveze imbono ehlukeneyo ngesinqumo sebhanga elikhulu lelizwe eleReserve Bank of Zimbabwe esokumisa uhlelo lokuthengiselana imali, olwe cash-in-cash-out, okuludaba oseluphikiswa emthethwandaba yinkampani yeEconet esetshenziswa kulokuhlelo.
Esethula umbiko wakhe weState of the Nation Address izolo, umongameli Emmerson Mnangagwa uthe uhulumende ulolwazi lokuthi kulohlupho lwemali elizweni njalo uzaluqeda ngenhlelo ezinengi ezigoqela ukulwisana labakhwezela ukumemetheka kwalo besebenzisa umkambo wensitha.
UMnu. Albert Mhlanga, ongusomabhizimusi njalo eyisiphathamandla sebandla leMDC utshele uSithandekile Mhlanga weStudio 7 ukuthi inyathelo le RBZ lizabangela ukumemetheka kokuswelakal kwemali yokusebenzisa okuvele kubhahile elizweni.
Siphinde saxoxa lomfundisi Anglistone Sibanda, olwela ilungelo loluntu yena othi ochasisa ukuthi kungani ukumiswa kohlelo lwama cash-in cash out okwenziwe nguhulumende kulinyathelo elihle.