UMongameli weMelika uMnu Donald Trump uthi uhulumende wakhe kabuyeli muva kudaba lokuvimba abakwamanye amazwe ukuza kweleMelika, esithi kumele bahlale emazweni abo.
Ekhuluma emhlanganweni weUnited Nations ngoLwesibili, uMongameli Trump uthe ilizwe lakhe lilelungelo lokuvikela imingcele yalo ngokuvimba abakwamanye amazwe laba ukuza kulo, ikakhulu labo abadinga ubuphepheli.
Wengeze wathi ilizwe ngelizwe lilelungelo lokwenza lokhu. UTrump uxwayise labo abaloyisa ukuza eMelika ukuthi bengalokothi ngoba bezabuyiselwa emazweni abo masinyane nje.
“Sesithethe amanyathelo aqinileyo ukwenqabela ukuza kwabantu eMelika ngaphandle komthetho. Labo abalenjongo yokweqa umngcele baze eMelika ngithi kini, lingalokothi,” kutsho uMongameli Trump.
UMongameli Trump, yena owaziwa kakhulu ngokuchothoza ukudlelana lokumanyana kwamazwe omhlaba kunhlangothi zonke zempilo, iglobalisation, ugcizelele insolo yakhe esithi eleMelika kalivumelani laloluhlelo njalo kalisoze liqhubeke liphatheka kulo.
“I-globalization ifile. EleMelika kalisoze liqhubeke lisekela loluhlelo,” kugcizelele uMongameli Trump.
UTrump uphathe njalo udaba lokudonselana phakathi kweMelika leChina kudaba lwemithelo kwezokuthengiselana esithi uhulumende wakhe uzaqhubeka ethese eleChina imithelo amazwe womabili aze avumelane ngendlela emsuthisayo.
Ukhulume njalo ngodaba lwezimpi ezitshiyeneyo iMelika ephakathi kwazo wathi ilizwe lakhe lifuna ukuthula emhlabeni jikelele hatshi ukuqhubeka lisilwa.
Kusasa khona uMongameli weZimbabwe uMnu Emmerson Mangwana uzakwethula amazwi akhe emhlanganweni ofanayo lapho akhangelelwe ukuchothoza izijeziso athi zetheswa eleZimbabwe ngamazwe athuthukileyo agoqela iMelika.
Ugcizelele linsolo emhlanganweni akhulume kuwo izolo esithi izijeziso lezi ziphazamisa intuthuko elizweni, ikakhulu kugatsha lwezempilakahle. Ngakho, uthe kumele zesulwe.
