Umanyano wabokholo lwesiKhristu, oweZimbabwe Heads of Christian Demonimations, uthi kumele kubunjwe uhulumende wenkazatho ozahlenga ilizwe edakeni eliphakathi kwalo njalo ozabusa okweminyaka eyisikhombisa kungelakhetho olwenziwayo emizameni yokuqeda ukufuthelana okudalwa yikudonselana phakathi kwamabandla ezombusazwe.
Lumanyano uthi udubo olukhona soluveze sobala ukuthi akulabandla ingqe yiliphi elingalulungisa lilodwa.
Ngokunjalo, uthi kumele kukhunyiswane umlotha kuqhutshwe njalo inkulumo zokuxazulula udaba lweZimbabwe ezizaletha uzulu wonke jikelele ndawonye.
Uthi iminyaka eyisikhombisa le kungenziwa ukhetho izakwaziwa ngokuthi yisikhathi seSabatha lapho okuzaba lokwehlisa umoya lokuxolelana.
Inkuthazo le iphume emhlanganweni oqhutshwe zinkokheli zamasonto lezi ngempelaviki.
Umfundisi Ray Motshi owesonto yeBaptist, yena obengekho emhlanganweni lo, utshele iStudio 7 ukuthi uyalisekela lelinyathelo.
