Ibandla leMDC lithi ukukhuphuka kwentengo yesinkwa isuka kumadola ayisitshiyagalolunye isiya kumadola alitshumi lanhlanu ngumzekeliso okhomba sobala ukwehluleka kwebandla leZanu PF.
Abapheka isinkwa bakhuphule intengo yaso ngoLwesithathu besithi kuyabadulela ukuthenga ingqoloyi phandle kwelizwe ngemali yakwamanye amazwe.
Ukukhwela kwentengo yempahla sokuyinsakavukela umchilo wezidwaba njalo sokulethele uzulu ubunzima obumangalisayo.
Okwenza umumo ubemubi kakhulu yindlala ekhona eyabangelwa yisivuno esiphansi ngenxa yokungani kuhle kwezulu.
AbeMDC bathi uMongameli Emmerson Mnangagwa usehlulekile, ngakho kumele avume ukukhulumisana lomkhokheli wabo uMnu Nelson Chamisa.
Kodwa abeZanu PF bona bathi ubunzima obukhona babangelwa yiMDC ngokucela amazwe afana leleMelika ukuthi ethese eleZimbabwe izijeziso.
Ukuhlaziya loludaba sixhume ilunga leZanu PF uMnu Believe Gaule lelunga leMDC uMnu Prince Dubeko Sibanda, ongumeli weBinga North edale lephalamende, onguye osungula lingxoxo.
