Asehleliwe amaqembu enguqu ukuthi azadlala njani kusigaba sama-quarter finals enkezo yeChibuku Super Cup njalo iqembu leHighlanders lizangqikilana leleFC Platinum.
Ekhuluma lentathelizindaba ngoLwesihlanu, umsekeli kamgcinisihlalo weHighlanders uModern Ngwenya uthe ukhangelele ukuthi iqembu lakhe liphumele.
“Thina vele singabokuncinta njalo sidlala umdlalo omnandi onambithisayo. Nxa ukhangele iBosso besivele sidlala kuhle kodwa obekuswelakala yinhlanhla.
“Khathesi inhlanhla isiphendukile njalo sekufuze sivune umsebenzi omuhle owenziwe zinkokheli, abaqeqetshi, abadlali kanye labasekeli beqembu,” kutsho uNgwenya.
Eminye imidlalo imi kanje; iqembu leTriangle lizadlala leleHarare City, iZPC Kariba izabhuqana leManica Diamonds kuthi eleBlack Rhinos lona lizangqikilana leleNgezi Platinum Stars.
Kumidlalo yeCastle Lager Premier Soccer League ngoMgqibelo iqembu leYadah lizakwemukela eleManica Diamonds enkundleni yeRufaro, eleMushowani Stars lizadlala leleTriangle ngaseTrojan Mine, eleTelOne lizangqikilana leleChapungu enkundleni yeAscot kuthi eleHerentals lona lizadlala leleBlack Rhinos eNational Sports Stadium.
NgeSonto iHwange izakwemukela iHarare City ngaseColliery.
