Ugatsha olubona ngezomkhathi elizweni olweMeteorological Services Department of Zimbabwe soluxwayise uzulu ukuthi azivikele ekutshiseni kwelanga okwedlulise amalawulo okuqale ngeviki edluleyo.
Isikhulumeli salolugatsha uMnu Tich Zinyemba uthi ngoLwesibili eTsholotsho kutshise ngendlela engakaze ibonakale kusukela ngomnyaka ka1962.
Uthi njalo ezinye zigaba ezihamba phambili ngokutshisa lokhu yiBeitbridge, iKariba, iHarare, iZvishavane kanye leBinga.
UMnu Zinyemba utshele umsakazo weStudio 7 ukuthi ama-temperatures adlalela phakathi kwe38 kusiya ku40 degrees celcius kulezindawo.
Lokhu kufaka impilo kazulu engozini enkulu ngoba umgoqo wokutshisa kumbe ukukhudumala komzimba womuntu yi37 degrees celcius kuphela.
Ngakho, uMnu Zinyemba uthi abantu kumele bazivikele ngokunatha amanzi amanengi lokuhlala emthunzini.
Wengeze wathi abazali kumele balimuke abantwababo bengabavumeli bedlalela elangeni.
“Imbangela yokutshisa lokhu ngumkhathi omileyo. Sikhangelele ukuthi kuqhubeke okwensuku ezithile,” kutsho uZinyemba.
Uzulu yena uthi ukutshisa kwelanga lokhu kwenza umumo wendlala ube mubi ngamandla.
“Umumo usumubi kakhulu eTsholotsho njalo abantu lezifuyo zabo kabatholi amanzi ngemfanelo,” kutsho uMnu Denis Ngwenya, yena osebenza lozulu weTsholotsho kunhlelo zentuthuko.
