Ukwehlukana kwemibiko ethulwe ngusibalukhulu webhanga elikhulu lelizwe uMnu John Mangudya lomphathintambo wezemali uMnu Mthuli Ncube phezu kokwethulwa kwemali entsha sokutshiye abanye bedidekile.
UMangudya wazise ngoLwesibili ukuthi uhulumende uzakwethula imali entsha, i$2 le$5 kumaviki amabili alandelayo ezasetshenziswa ndawonye lama-bond avele ekhona.
Kodwa uNcube utshele intathelizindaba ukuthi imali entsha kudala yethulwa.
Uthe osokusenziwa yikuyifaka emkambo wemali. Lokhu kudide abanye ingqondo abathi kabasakwazi ukuthi okuyikho yikuphi.
Kodwa bakhona abanye abavumelana loNcube abathi imali entsha yethulwe kunyanga ezedluleyo lapho uhulumende azise khona ukuthi ama-bond, amaRTGs kanye lemali esemabhukwini abantu isisaziwa ngokuthi yiZimbabwe dollars.
Umkhokheli wenhlanganiso yeMatabelaland Development Inititaive uMnu Freeman Ncube utshele iStudio 7 ukuthi banengi abaphicekileyo.