Uhulumende usesole athi yikungahloniphi komeli weMelika eHarare uMnu Brian Nichols kulandela amazwi akhe okuthi umnotho weZimbabwe ubulawa yikwephulwa kwamalungelo oluntu nguhulumende lemisebenzi yenkohlakalo hatshi izijeziso ezetheswa amalunga eZanu PF yiMelika lomanyano weEuropean Union.
UAmbassador Nichols wethule amazwi la ngeviki edluleyo ngesikhathi sokutshengisela okwakuqoqwe nguhulumende kaMongameli Emmerson Mnangagwa esola isijeziso lezi esithi kumele zesulwe. Balutshwana abaphatheka kuloluhlelo.
Umphathintambo obona ngobudlelwano beZimbabwe lamanye amazwe uMnu Sibusiso Moyo wethule umbiko olamazwi aqatha izolo echothoza uNichols esithi uziphatha njengelunga lebandla eliphikisayo njalo kalandeli imithetho elawula ukuziphatha kwabameli bezigodlo zamanye amazwe.
Uqhubeke wathi eleMelika kalimelanga libe lokudelela ngoba uhulumende weZimbabwe engabuquma ubudlelwano phakathi kwamazwe womabili kungabi ndaba zalutho.
Kodwa ingcwethi kwezombusazwe uMnu Dumisani Nkomo utshele iStudio 7 ukuthi akaboni lokhu kusenzeka.
Asenelisanga ukuxoxa labesigodlo seMelika ngaloludaba.