Inhlanganiso yamagqwetha eye Law Society of Zimbabwe isikhweze imbadalo yokuthola usizo lwabammeli.
Nxa ufuna ukumelwa ligqwetha usuzahlawula imali engamadola azinkulungwane ezinhlanu, RTGS$5 250 ngehola linye kuthi abefuna ukwesula umtshado kumbe idivorce ngesilngu, sokuzamele bahlawule RTGS$18 000 nxa umuntu emangalela umkakhe kuthi umamangalelwa uzahlawula amadola azinkulungwane ezilitshumi lambili, RTGS$12 000.
Lokhu kusolwe ngabanengi abathi sokuzakubanzima ukuthola abammeli emthethwandaba.
Kodwa elinye igqwetha, uMnu. Job Sibanda utshele uChris Gande weStudio Seven ukuthi imbadalo kayikhwelanga kodwa udubo yikuthi iguqulwe isukela kumadola eleMelika kade kuyiwo asetshenziswayo yaqanjwa ngedola leZimbabwe.
Inengi lithi kalisoze lenelise ukuthola abammeli emthethwandaba ngenxa yokukhwela kwembadalo yamagqwetha okwethulwe yinhlanganiso ye Law Society of Zimbabwe.
UChris Gande we Studio Seven uphinde waxoxa locubungula ezombusazwe, uMnu. Thandeko Zinto Mkandla ukuze sizwe imbono yakhe ngaloludaba.