UMongameli Emmerson Mnangagwa ngoLwesihlanu uqhelise inani lamalunga edale labaphathintambo bakahulumende wakhe ngokubumba ugatsha olutsha olweNational Housing and Social Amenities njalo wakhetha abasekeli babaphathintambo abatsha abahlanu.
Umphathintambo wogatsha olutsha lolu nguMnu Daniel Garwe.
UMnangagwa ususe njalo abaphathintambo abathile wabafaka ezikhundleni ezintsha.
Obengumphathintambo wendaba zasekhaya (Home Affairs) uMnu Cain Mathema usengumphathintambo wezemfundo (Primary and Secondary Education).
Esikhundleni esitshiywe nguMathema kufakwe uMnu Kazembe Kazembe, yena obengumphathintambo wogatsha lweInformation Communication Technology, Postal and Courier Services.
UMnu Nqobizitha Mangaliso Ndlovu, obengumphathintambo obona ngokusebenza kwamankampani (Industry and Commerce) usengumphathintambo ngokuguquka komkhathi lokwethekelelwa kwelizwe (Environment, Climate Change, Tourism and Hospitality.
Obengumphathintambo walolugatsha uNkosikazi Prisca Mupfumira yena utshiywe phandle kulandela ukubotshwa kwakhe ngamacala enkohlakalo.
Abasekeli babaphathintambo abatsha babalisa uMnu David Musabayana owogatsha lweForeign Affairs, uMnu Raymore Machingura oweHigher Education, uTinoda Machakarika oweYouth, Sport, Arts and Recreation loClemence Chiduwa ongumsekeli kaMnu Mthuli Ncube kugatsha lweFinance and Economic Development.