Inhlanganiso ezimela izisebenzi zithi umphathintambo wezemali uMnu Mthuli Ncube kumele abele ingatsha eziqakathekileyo ezifana lolwezemfundo, olwe-social welfare lolwezempilakahle imali ephezulu ngoLwesine lapho azakwethula khona ibudget yomnyaka ozayo.
Isiphathamandla senhlanganiso yababalisi, eyeZIMTA, uMnu Richard Gundane uthi ugatsha lwezemfundo yilo olumele luthole imali enengi ukuze kwakhiwe izikolo ezintsha njalo ababalisi labo bengezelelwe iholo.
“Ugatsha lwezemfundo kumele luphiwe imali enengi ngoba izikolo ziyasilela kanye lababalisi. Ugatsha lwezempilakahle lolwe-Social Welfare lazo kumele zithole imali ephezulu,” kutsho uGundane.
Amazwi kaGundane agcizelelwe ngunobhala jikelele weZCTU uMnu Japhet Moyo yena othi uNcube kumele aphe izisebenzi zikahulumende imali enengi ngoba zihola imali encane kakhulu.