amalinks wokungena

Breaking News

Abanye Bathi uMongameli Mnangagwa loMugabe Zimbila Zantabanye


Ngemva kweminyaka emibili amasotsha egenqule uMnu Robert Mugabe embusweni, izizalwane zeZimbabwe ezihlala kweleSouth Africa zithi selitshabalele ithemba lokuthi uMongameli Emmerson Mnangagwa angenza ngcono kuloMugabe.

Kwathi ngokumemetheka kwemibiko yokuthi imota zebutho zasezilubhekise esigodlweni selizwe ukuyakhipha uMugabe mhlaka 14 kuLwezi, 2017, kwaqubuka injabulo enkulu kuzulu.

Mhlaka 21 uMugabe wamemezela ukuthi usesuka embusweni. Kwagcwala phamu ezitaladeni zeGoli lakwezinye indawo uzulu ethokoza.

Ngemva kweminyaka emibili uMugabe esukile emsusweni njalo sowaze wazitshonela, izizalwane zeZimbabwe zithi le yintokozo eyadlaliswayo njengoba impilo isinzima ukwedlula ngesikhathi sikaMugabe.

Abanye bathi kwakungaqondanga ukuthi abantu bajabulele isenzo sebutho lesi. Kodwa umgcinisihlalo wenhlanganiso yeZimbabwe Community in South Africa uMnu Ngqabutho Mabhena, uthi akavumelani labatshonjalo.

“Abantu babengathokozeli ukuthi kungena uMnangagwa. Kodwa babebona kulithuba lokuthi kube lotshintsho kwezombusazwe lemnothweni elizweni laseZimbabwe,” kutsho uMnu Mabhena.

Ingcitshi kwezombusazwe uMnu Zenzo Moyo uthi iphutha laba ngelokucabanga ukuthi abangenayo bazabusa ngcono bona labo bevele bengabebandla linye loMugabe.

“Lapho abantu abangabe baphambanisa khona yikuthi ngelanga kusiyabuthanwa kuqoqwa ukuthi uMugabe afuqwe kube yi-last push, abantu kwakungamelanga ukuthi bakwenze lokho ngoba kwasuka kwabonakala engathi bathi bona icoup iright,” kutsho uMnu Moyo.

“Kwakumele bazihlalele abantu, abe-army benze lokhu abakwenzayo ukwenzela ukuthi batsho bathi kodwa abantu abazange basisapote sikwenza lokhu.”

UMabhena uthi ngemva kokubuswa ngocuku okweminyaka, ukubulawelwa izihlobo, ukudla imbuya ngoluthi kungelamisebenzi, ukubalekelwa kwelizwe yizinkulungwane zabantu okugoqela labakhubazekileyo emehlweni, kayikho enye into eyayingenziwa ngaphandle kokujabulela ukususwa kukaMugabe.

“Ukuthatha kwamasotsha kwakuyiyo indlela eyayiqondile kodwake okwasuka kwaba lephutha khona yikuthi akuzange kube lesivumelwano ukuthi nxa sekuphuma uMugabe kungenwa njani embusweni.”

Osakhulayo webandla leZAPU uMnu arnicious Nkala, utshele iStudio 7 ukuthi uzulu akumelanga asolwe ngoba abakhipha uMugabe laba bazigqokisa isikhumba semvu bona besazi mhlophe ukuthi ngaphakathi bazimpisi.

“Siyabona ukuthi uMnangagwa kwakuyikuba ngumuntu-nje owayefuna ukungena embusweni kodwa engela-plan. Lakhathesi akakwazi ukuthi wenzani,” kutsho uMnu Nkala.

“Akekho umuntu omjabulelayo ngoba phela labantwana sebelaleka ekhaya akuselalutho sekuworse than lesiyana isikhathi. Akutsho phela ukuthi uMugabe wayengcono. Kutsho ukuthi sasuka epanini seqela emlilweni.”

please wait

No media source currently available

0:00 0:05:06 0:00

Facebook Forum

XS
SM
MD
LG