Ngemva kwamaviki ambalwa kuhluzisiswa ensitha udaba lokuthi uMongameli Donald Trump weleMelika wayefuna ukuthi ilizwe le Ukraine lidinge udaka angabhica ngalo omunye wabakhangelele ukumncintisa kukhetho lomnyaka ozayo andubana liphiwe uncedo lwezomvikela uzulu uze wazizelwa ngokwakhe ubufakazi obethulwayo.
Umgcinisihlalo wekhomidi ye Intelligence, uMnu. Adam Schiff nguye okhokhela loluhlelo.
Kodwa uMongameli Donald Trump yena elokhu esithi uqanjelwa amanga.
Oqale ukwethula ubufakazi ngowayeyisiphathamandla esigodlweni seMelika kwele Ukraine uMnu. William Taylor.
UTaylor uthi okwakusenzakala kwamtshiya engahlalisekanga kuhle ngoba kwakungekho emthethweni.
UTaylor uthi kwabamgceke ukuthi uncedo olwalumele luphiwe iUkraine lwalusetshenziswa njengesifumbathiso sokuba kucutshungulwe uMnu. Joe Biden.
Yen uBiden uthi mpela okwenziwa nguTrump kumele athoniswe.
Abanye abaphe ubufakazi yisisebenzi sogatsha lwe State Department uMnu. George Kent. Omunye njalo okhangelelwe ukupha ubufakazi ngowake wamela eleMelika kwele Ukraine, uNkosikazi Marie Yovanovich.
UYavanovich uthi kulobufakazi bokufumbathiswa.
Amalunga ebandla lika Trump elama Republicans athi akulabufakazi bokuthi uTrump wayefuna ukufumbathisa uMongameli Volodymyr Zelenski wakwele Ukraine ngoba loluncedo okwakuthiwa wayefuna ukufumbathisa ngalo lwaphiwa ilizwe leli.
