Inhlanganiso elwela amalungelo ababalisi bemaphandleni eyeAlmagamated Rural Teachers Union of Zimbabwe- kumbe ARTUZ, ephakathi kokukhalala umsebenzi okwensuku ezimbalwa ngeviki ngoba ifuna ukwengezelelwa iholo ithi abantwana bacitshe baswela ababalisi bokubahlola lapho bebhala umhloliso edolobheni leVictoria Falls ngoLwesibili.
Inhlanganiso le yethule umbiko isithi uhulumende uze wadinga ababalisi abavela ezikolo ze Baobab, Chinotimba, leChamabondo Primary Schools kulelodolobho ukuthi bayehlola abantwana esikolo seMosi oa Tunya High School abakade bebhala iphepha lakuqala leHistory ngoba abanye benqabile ukukwenza lokhu.
Ngalokho, i-ARTUZ ithi kufanele uhulumende alalele izikhalazo zabo ngoba uhlupho lolu lungabe lubhahile lakwezinye izikolo zelizweni jikelele.
Isiphathamandla seARTUZ uMnu. Mduduzi Jubane utshele uSithandekile Mhlanga weStudio 7 ukuthi ababuyeli emuva ngokukhalala umsebenzi uhulumende aze alungisise izikhalazo zabo.
