Ibandla leMDC lithi ukungabikhona kwamalunga alo edale lephalamende kusethulwa uluhlu lwebudget izolo ngumphathintambo obona ngenhlelo zemali uMnu. Mthuli Ncube kubangelwe yikuthi bahambe ukuyaphathisa ukungcwaba amalunga ebandla leli eMasvingo leMarondera, njalo bamazisile usomlomo wedale uMnu. Jacob Mudenda ngaloludaba.
Kubhubhe uMnu. Amire Takawira, loMnu. Paul Chikuni abeMashonaland East ngeSonto engozini yomgwaqo.
Abanye bathi ibandla leMDC liyekele ngabomu ukuya edale lephalamende, ngoba lisithi alinanzi njengomkhokheli welizwe umongameli Emmerson Mnangagwa, yena obekhona kusethulwa I budget.
Kodwa uNkosazana Thabitha Khumalo, okhokhela amalunga ebandla leMDC ephalamende, njalo engumgcinisihlalo walelibandla utshele uSithandekile Mhlanga weStudio 7 ukuthi ngempela bebengasoze bayekele ukududuza imuli ezilahlekelweyo, kodwa lanxa kunjalo, belokhu bengamnanzi umongameli Mnangagwa njengomkhokheli welizwe.
