Ngemva kweminyaka emibili uhulumende kaMnu. Robert Mugabe ususwe embusweni libutho ngomnyaka ka 2017 umnotho welizwe usufike kusibanga esingakaze sibonakale intengo yempahla iqonga mihla ngemihla amanzi lamagetsi esetholakala kanye kumbe kabili ngeviki imisebenzi isililihlo lentwala ngokungabonakali.
UMongameli Emmerson Mnangagwa wathi ethatha intambo zombuso wathembisa ukuthi uhulumende wakhe usevule amasango kulabo abafuna ukuzosungula amabhizimusi kodwa amazwe angentshonalanga amanengi wona avala amasongo esithi uhulumende wephula amalungelo kazulu.
Kodwa abasekeli bebandla leZanu PF bathi uMnangagwa kaphiwe ithuba ngoba wathatha intambo zombuso umnotho usuvele ubhacalelele.
Omunye wabatsho njalo ngumsekeli kaphathintambo wezembiko lobuncitshi balezinsuku, uMnu. Dingumuzi Phuthi saqala ngokumbuza ukuthi abakhala ngobunzima bempilo balezizatho na?
Kodwa osakhulayo oyisiphathamandla sebandla leMDC, uMnu. Gift Ostalos Siziba uthi iminyaka emibili edluleyo itshengisa ukwehluleka kukaMongameli Mnangagwa lohulumende wakhe.
Umlobi osakhulayo, uMnu. Owen Mothobi Moyo uthi kunengi okutshengisa ukuba uhulumende okhona engaze aphiwe eminye iminyaka eminengi angeke avuselele umnotho welizwe.
Uhulumende uthi imizamo yakhe yokuvuselela umnotho iyasebenza osekubangele ukuthi ayekethise isikhathi sokubopha amabhanti, iausterity ngesilungu. Kodwa uzulu uthi akula ngitsho okutshengisa lokhu.
