Uhulumende weMelika uthi ukhathazeke kakhulu ngochuku lwamapholisa eZimbabwe kulandela ukubhaxabula akwenze abasekeli beMDC lozulu makhaza eHarare izolo.
Umsekeli kanobhala obona ngobudlelwano beMelika lamazwe aseAfrica uMnu Tibor Nagy uthi uhulumende weZanu PF kumele atshiyane lomkhuba wokuhlukuluza uzulu njalo ahloniphe amalungelo oluntu.
Amapholisa ahlasele abasekeli beMDC emahofisini alelibandla ngesikhathi bemelele umkhokheli wabo uMnu Nelson Chamisa ukuthi abethulele umbiko wakhe ophathelane lokwenzakalayo elizweni oweHope of the Nation Address.
Abantu makhaza ekade bezihambela, abagoqela amakhehla lezalukazi labo batshayiwe balimala kakubi.
Embikweni awethule enkundleni yeTwitter, uMnu Nagy uthe isehlakalo lesi sikhomba sobala ukuthi ukwesulwa kwemithetho ecindezelayo egoqela owePOSA akuguqulanga lutho.
Ukhuthaze njalo uhulumende ukuthi ahloniphe isisekelo sombuso welizwe, sona athi sivumela abantu ukuthi babuthane ngokuthula.
Ingcwethi ecubungula ezombusazwe uMnu Effie Dlela Ncube utshele iStudio 7 ukuthi uchuku lwamapholisa lolu soluveze sobala ukuthi akulamahluko phakathi kombuso kaMongameli Emmerson Mnangagwa lomuyi uMnu Robert Mugabe.
Kusenjalo, umkhokheli weMDC uMnu Nelson Chamisa wethekelele abalinyazwe ngamapholisa laba ezibhedlela izolo ebusuku.
Ibandla leMDC lithi amanye amalunga alo abotshiwe kodwa alikabi kwazi ukuthi etheswa cala bani.
Embikweni awethule kuTwitter, uChamisa uthe abalimale kakhulu bagoqela owesilisa osekhulile odabuke ikhanda, uMnu Bernard Garapo oleminyaka engamatshumi ayisithupha lasithupa (66) kanye lomunye owesifazana.
Umgcinisihlalo weMDC uNkosazana Thabitha Khumalo uthi uhitshwe yintuthu ye-tear gas kulesi sehlakalo njalo uthi laye wethekelele abalimeleyo.
Asenelisanga ukukhuluma lamapholisa ngaloludaba.
Kodwa isikhulumeli sawo uMnu Paul Nyathi utshele lumsakazo kunsukwana ezedluleyo ukuthi kabalayo injongo yokuhlukuluza ibandla leMDC nanku balivumele ukuqhuba umhlangano walo eMabvuka ngeSonto.
