Abasekeli beMDC abayisikhombisa ababotshwe ngoLwesithathu ngemva kokuhlaselwa lokutshaywa ngamapholisa ngesikhathi bemelele ukuzwa umbiko obuvela kumkhokheli wabo uMnu Nelson Chamisa, abagoqela usana olulenyanga ezilitshumi, bakhululwe ngumthethwandaba izolo ngesibambiso se-bail.
Umntwana lo ubelonina njalo balele esitokisini bonke. Abantu laba betheswe icala lobudlwangudlwangu, i-criminal nuisance ngesingisi.
Kodwa inhlanganiso yamagqwetha abamelayo iZimbabwe Lawyers for Human Rights ithi bayalilandula lelicala.
Banengi abalimeleyo njalo abelatshwayo ezibhedlela ngemva kokutshaywa kabuhlungu ngamapholisa abagoqela abantu nje makhaza abangelani lokwenza lebandla leMDC.
Isikhulumeli sikaChamisa, uDr. Nkululeko Sibanda utshele iStudio 7 ukuthi ibandla lakhe lidingele abalimeleyo odokotela ngitsho lalabo abangasiwo malunga alo.
Uzulu yena usesole ukutshaywa kwabantu laba esithi lokhu kuveza sobala ububi bombuso kaMongameli Emmerson Mnangagwa.
Amapholisa eZimbabwe adume ngochuku ebantwini njalo ngesikhathi sikahulumende wenkazatho phakathi kweMDC leZanu PF kwakulesivumelwano sokuthi kumele afundiswe kutsha umsebenzi, ikakhulu indaba zokuhlonitshwa kwamalungelo oluntu.
Khepha lokhu kwaphelela eboyeni njengezithukuthuku zenja.
Umeli weBulilima West edale lephalamende njalo elilunga leZanu PF uMnu Dingumuzi Phuti uthi akusilo qiniso ukuthi amapholisa asaqhubeka ngokuhlukuluza abantu ngendlela abesenza ngayo ngesikhathi sombuso kaMugabe.
Kodwa ilunga leMDC uMnu Edwin Ndlovu uthi uchuku lwamapholisa luyethusa.
