Umsekeli kamongameli welizwe, uMnu. Constantino Chiwenga uze waveza ukuba wayebulawa ngumkhuhlane bani ngeMpelasonto eWedza lapho kade kulombuthano wokubonga ukusinda akwenzayo kulandela ukugula kwakhe.
UChiwenga uthi ubebulawa ngumkhuhlane othiwa idiopathic oesophageal stricture.
Odokotela abakhulume le Studio Seven bathi lumkhuhlane ulakho ukuhlasela umuntu odliswe itshefu kumbe onatha kakhulu utshwala obubukhali. Sixoxe lengcwethi kwezempilakahle, uDokotela Themba Manzini ukuze sizwe okunengi ngalumkhuhlane.
Lokhu sikudaba lunye, uMongameli Emmerson Mnangagwa ubengekho emkhosini obuqoqwe ngumsekeli wakhe, uMnu. Constantino Chiwenga.
UMnangagwa wayengekho njalo egcekeni lendizamtshina lapho uChiwenga evela kwelatshwa kwele China lapho ahlala khona inyanga ezedlula ezine.
Lokhu kukhwezela inkulumo yokuthi ababili laba balobudlelwano obungasacacanga.
Kodwa obengekho kwaze kwabasobala ngunkosikazi kaChiwenga, uMary.
UMary Chiwenga, owayengaswelakali eceleni likamkakhe kakabonakali emphakathini osekubangele ukuthi abanye njalo bathi umtshado wababili laba ukhanya usumi manzonzo.
Sixoxe lolwela ilungeelo likazulu, uMnu. Mbuso Fuzwayo ukuze sicubungula loludaba.
