Odokotela bathi bazatshengisela ezitaladeni zeHarare namuhla besuka esibhedlela seParirenyatwa besiya edale lephalamende ukuyakhuthaza amalunga alelidale ukuthi athathe amanyathelo okulungisisa ukusilela kwemithi ezibhedlela, imitshina yokuhlola izigulane lakho konke okuhluphayo kwezempilakahle.
Inhlanganiso emela odokotela bezinga laphezulu eyeZimbabwe Senior Hospital Doctors Association ithi ukutshengisela lokhu kuzaqala ngo9:30 ekuseni.
Odokotela laba baqalise ukukhalala umsebenzi ngeviki edluleyo bekhonona ngeholo eliphansi njalo besola ukuxotshwa umsebenzi kwabodokotela bezinga laphansi besithi uhulumende kumele ababuyisele emsebenzini.
Bebesola njalo ukusilela kwemithi ezibhedlela lezinye indingeko.
Odokotela bezinga laphansi, ama-junior doctors, abedlula amakhulu amane baxotshwe nguhulumende ngemva kokukhalala umsebenzi okwenyanya ezimbili befuna ukwengezelelwa ngeholo.
Umumo okwamanje ubikwa umubi kakhulu ezibhedlela njalo lezigulane lazo zisifa ngobunengi ngoba odokotela bengekho kuthi lapho abayabe bekhona kuswelakale lemithi. UNtungamili Nkomo weStudio Seven uxoxe lesiphathamandla senhlanganiso elwela amalungelo oluntu eyeOccupy Africa Unity Square uMnu Charles Nyoni ngaloludaba.
