Uhulumende weZimbabwe uthi useyehlise intengo yempuphu njalo isaka le10kg ebelithengiswa nge$100 selizabiza i$50.
Embikweni awethule ngoLwesine, umphathintambo wezemali uMnu Mthuli Ncube uthe bavumelene phezu kwentango le lenhlanganiso yabagaya umumbu iGrain Millers Association of Zimbabwe.
Ukwehla kwentengo yempuphu lokhu kutsho ukuthi indleko enengi isizakuya emahlombe kuhulumende, yena ozahlawula amankampani agaya impuphu.
UMnu Ncube uthi uhulumende uthethe lelinyathelo ngoba ekunanzelela ukubana uzulu ubhekane lendlala enkulu.
Abantu abayizigidi eziphose zifike kweziyisitshiyagalombili, 7.7 badinga uncedo lokudla oluphuthumayo ngenxa yendlala.
Omunye olenkampani egaya umumbu utshele iStudio 7 ukuthi isaka le20kg selizabiza i$100 kuthi i50kg yona ebithengiswa nge$517 isizabiza i$250.
Ukuhlaziya loludaba sixoxe lesiphathamandla senhlanganiso emela abathengi eyeNational Consumer Rights Association uMnu Effie Dlela Ncube yena othe leli lingaba linyathelo elihle alubana lithe laphumelela.
