Lanxa uhulumende esithi ulenhlelo ezithile aziqhubayo ezokulungisa umnotho welizwe lokwethula ubunzima ebantwini, ingcwethi ezicubungula ezomnotho zithi kufanele aqale alungise ezombusazwe kanye lenhlelo zemali.
Umphathintambo kahulumende obona ngobudlelwano lamanye amazwe uMnu. Sibusiso Moyo uthi eleZimbabwe liyalungisa ezombusazwe lanxa lihamba kancinyane kancinyane njalo selisungule eminye imithetho eyayilindelwe ekusisekelo sombuso esitsha.
Umphathintambo obona ngenhlelo zemali uMnu. Mthuli Ncube uthi intento yempuphu isiyehlisiwe njengokuthembisa kukamongameli Emmerson Mnangagwa, njalo i-10kg ebibiza i$100 isiku $50.
Kodwa uMnu. Bulisani Ncube, ingcwethi ecubungula ezomnotho welizwe njalo engusomabhizimusi, utshele uSithandekile Mhlanga weStudio 7 ukuthi isisusa sendaba liphutha kunhlelo zemali.
