Kuhlelo Woza Friday liviki sileqembu leTanga Pasi, lona elisanda kwethula idlalade lalo elitsha elilesihloko esithi ‘Bakalanga We.’
Leli lidlalade lalo elesibili njalo liphekwe ngobunono lobugabazi obukhulu njengelakuqala abalethule ngo2012.
lqembu leli lidabuka esigabeni seNgwana, ePlumtree kodwa lihlabela likweleGermany.
Umholi weTanga Pasi uSinini Ngwenya uthi bazakuyalethula eZimbabwe lelidlalade ngesikhathi sekhisimusi.
“Sizozama ukuthi silethule lelidalalade khonale ekhaya njengoba kuyi-festive season nje,” kutsho uNgwenya ekhuluma lomsakazo weStudio 7.
“Abantu sizabazisa enkundleni zokuxhumana lapha ukuthi sizalethulela ngaphi; kungaba koBulawayo kumbe ePlumtree.”
Iqembu leli lihlabela ngendimi ezigoqela isiKalanga, isiNdebele, isiKhiwa isiJelimana lesiSwahili.
Idlalade leli litholakala ezitolo ezisenkundleni zobulembu be-internet ezitshiyeneyo ezigoqela iAmazon, Spitify, leSoundcloud. Lilengoma eziyisitshiyagalolunye.
