Ukubuyiselwa kwemali efakelwa nguhulumende ukuze intengo yempuphu ibe nganeno lokuthembisa ukufakela intengo yokunye ukudla okwenziwa nguMongameli Mnangagwa kutshiye abanye abathengi bejabula kodwa ingcwethi kwezomnotho zisithi inyathelo leli lizabangela ukugugudeka komnotho welizwe.
Ukufakela imali okwenziwa nguhulumende ukuze intengo yempahla ibe nganeno emazweni atshiyeneyo akwandanga ukusebenza kuhle, ikakhulu emazweni alenotho exegayo njengeye Zimbabwe.
Usibalukhulu wogatsha lwabasakhulayo kubandla le MDC, uMnu. Ostalos Siziba uthi uhlelo lukahulumende lolu alusoze luphathise njengoba umnotho welizwe usebenzisa imali engelasisindo phandle kwelizwe.
Kodwa ilunga ledale le central committee eyebandla leZanu PF, uMnu. Joseph Tshuma uthi okwenziwe nguhulumende kuyangcomeka njalo asikho kuthenga amavoti njengalokho okucatshangelwa ngabanye.
Ingcwethi ecubungula ezomnotho, uMnu. Masimba Kuchera uthi lanxa lolu kuluhlelo oluzekethisa ubunzima obukhona elizweni indlela okwenziwa ngayo akusoze kusebenze.
Lanxa sokwedlule phose amaviki amabili uMongameli Mnangagwa wathembisa ukufakela imali kuntengo yokunye ukudla lokhu kusathengwa ngentengo endala.
