Umka msekeli kaMongameli welizwe, uMnu. Constantion Chiwenga, uMarry, umiswe emthethwandaba ngoMvulo esetheswa amacala ambalwa agoqela lelokufuna ukubulala uChiwenga ngesikhathi egula eSouth Africa.
UMary, ubikwa ethethwe endlini eBorrowdale ngamapholisa ogatsha lwe ZACC amngenele endlini egeza amhluthunela abantwana ngoMgqibelo wavalelwa estokisini seRhodesville esithiwa singcole okwesabekayo.
Umtshutshisi, uMnu. Michael Reza utshele idale ukuthi uMarry wetheswa icala lokuvalela uChiwenga ehoteleni ukuthi engatholi ukwelatshwa waze wasiwa esibhedlela ngenkani.
Lalapho esesibhedlela uChiwengwa uMarry ubikwa wasiphuna amatube abalisa idrip ayefakwe ngabodokotela ukusiza uChiwenga idale elithi wayefuna ukumbulala.
Amanye amacala ayetheswa uMarry abalisa ukususa imali elizweni edlula isigidi esisodwa athenga ngayo indlu kwele South Africa.
Elinye njalo icala eletheswa uMarry ngelokuthi wazitshadisa ngokutshela umkhokheli wabehluli, uMnu. George Chiweshe ukuthi adinge isiphathamandla sedale ukuthi simtshadise yena uChiwenga esesibhedlela.
Umantshi, uMnu. Crispen Mberewere utshele uMarry ukuthi kumele aphenduke ukuzothoniswa ekupheleni kwayonale inyanga.
UMarry usezagcinwa ejele le Chikurubhi ngoba umthethwandaba walile ukuthi athoniswe esuka endlini.
Kodwa amagqwetha ache athi azacela idale le High Court ukuthi limuphe ithuba lokuhlawula imali yesibambiso sebail.
Sixoxe lengcwethi kwezemithetho, uMnu. Matshobana Ncube saqala ngombuza ukuthi uMarry Chiwenga ulalo na ithuba lokuphiwa isibambiso sebail?
Ukuhlaziya loludaba sixoxe lengcwethi ecubungula ezombusazwe, uMnu. Rejoice Ngwenya.