Ibandla leMDC lithi lanxa u2019 ubungumnyaka onzima kakhulu ebantwini abanengi, uzulu kamelanga alahle ithemba ngelakusasa lakhe.
Ngaphandle kokubhidlika komnotho lokukhwela mahlayana kwentengo ezitolo, abantu abangu7, 7 million bahlaselwe yindlala njalo badinga usizo lokudla oluphuthumayo.
Amafutha ezimota lamagetsi lawo ayasilela elizweni. Ngokunjalo, iMDC ithi inengi kalisoze libe lenjabulo ngekhisimusi yalonyaka.
Ithi njalo ubunzima lobu buveza sobala ukwehluleka kukahulumende kaMongameli Emmerson Mnangagwa.
Kodwa lelibandla lithi uzulu kamelanga alahle imbeleko ngokufelwa ngoba ubunzima lobu buzaphela lingangena embusweni.
“Bengilaye umkhokheli wethu uMnu Nelson Chamisa esethekelela abantu abagogekileyo labanye ebapha izipho zeKhisimusi,” kutsho isikhulumeli seMDC uMnu Daniel Molokele.
“Umbiko abatshiyele wona ngowokuthi mabangalahli ithemba ngoba inguquko isendleleni. Do not lose hope because change is on its way. Yiwo umbiko ovela kuPresident Chamisa.
“MaZimbabweans, umnyaka ka2019 ubungumnyaka olenhlungu ezinengi. Ngakho uPresident Chamisa uthi njengeMDC silethemba ukuthi umnyaka ka2020 uzaletha inguquko,” kutsho uMolokele.
lunga leZanu PF uMnu Believe Gaule yena uthi ngempela impilo ibinzima ebantwini abanengi lonyaka.
Ngakho, uthi okudingakalayo yikuthi kube lokukhulumisana phakathi kwabezombusazwe, okugoqela abebandla lakhe labeMDC.
“Hayi iKhisimusi leli alilihle sibili, kulokusilela okunengi phakathi kwabantu. Kodwa sikhangelele ukuthi kube lobubelo kuyiwa phambili. Kumele kube lokukhulumisana,” kutsho uMnu Gaule.
