Uzulu weZimbabwe uzadlala ikhisimusi namuhla inengi lihlaselwe yindlala njalo lingenelisi ukuthenga indingeko zempilo ngenxa yokutshabalala komnotho.
Ngaphandle kwendlala lokusilela kwemali emabhanga, uzulu ubhekane lokusilela kwamanzi emadolobheni afana lakoBulawayo, ukusilela kwamafutha ephethulo ledizili kanye lokusilela kwamandla kagetsi.
Ngakho, inengi lithi ikhisimusi yanamuhla yikhisimusi nje ngebizo kuphela. Isakhamuzi sakoBulawayo uMnu Prince Khumalo uthi okudanisa yikuthi ukudla okumqoka empilweni kazulu, okugoqela impuphu kubiza imali engeneliswa ngabanengi.
Uhulumende wazise kumaviki amabili edluleyo ukuthi i10kg yempuphu kumele ithengiswe ngamadola angamatshumi amahlanu, $50. Kodwa ibikwa ithengiswa nge$100 kwezinye indawo.
Ukusilela kwemali lakho kuyaqhubeka emabhanga lanxa nje iReserve Bank of Zimbabwe isithi ifake imali engange$20 million emkambo wemali ngeviki edluleyo.
Udubo lwemali lolu soluleminyaka uhulumende esehluleka ukululungisisa. Ingcwethi kwezenotho uMnu Reggie Shoko uthi ubona luqhubeka njalo ngomnyaka ozayo.
Inengi lisola uhulumende weZanu PF ngokwehluleka ukuvuselela umnotho lokudala amathuba emisebenzi eyathenjiswa abantu nguMongameli Emmerson Mnangagwa ngesikhathi ekhankasela ukhetho nyakenye.
Embikweni wokufisela uzulu ikhisimusi elihle, uMnangagwa uthe uhulumende usebenza nzima emizameni yokuthuthukisa impilo kazulu. Amazwi akhe asekelwe lilunga leZanu PF uMnu Believe Gaule.
Kodwa umgcinisihlalo weMDC uNkosazana Thabitha Khumalo uthi uMnangagwa nguye odilize umnotho. Ngakho, ithi ebantwini abanengi ikhisimusi yanamuhla kufana nje lokuthi kayikho.
Kungelani lobunzima bonke elibhekane labo, sithi khisimusi enhle.
