Inhlanganiso ezimela izisebenzi zithi izisebenzi bezithwele gadalala lonyaka ngenxa yokutshabalala komnotho njalo zithi uhulumende labaqhatshi kumele bengezelele izisebenzi zabo iholo ekuqaleni komnyaka ozayo.
Zithi njalo izisebenzi ezinengi zilahlekelwe yimisebenzi lendlela ezitshiyeneyo zokuziphilisa lonyaka.
Unobhala jikelele weZCTU, uMnu Japhet Moyo ithi nxa uhulumende engekela ukuthatha amanyathelo aqinileyo, izisebenzi zizaqhubeka zisidla imbuya ngoluthi.
“Asiboni umnyaka ozayo usiba ngcono ngoba akula nhlelo zikahulumende ezisebenzayo ezilakho ukuguqula umumo,” kutsho uMnu Moyo.
Amazwi kaMoyo agcizelelwe yisiphathamandla senhlanganiso yeAmalgamated Rural Teachers Union of Zimbabwe (ARTUZ), uNkosazana Melissa Chingwanangwwana.
“Umnyaka lo ubunzima kakhulu kithi amatitsha ngoba kunengi okwenzakeleyo kwesenotho okusitshiye sengasenelisi ukuziphilisa kuhle lemuli zethu,” uNkosikazi Chingwanangwana utshele iStudio 7.
Embikweni wokufisela uzulu weZimbabwe ikhisimusi, uMongameli Emmerson Mnangagwa uthe uyakwazi ukuthi abantu abanengi bathwele nzima.
Ngokunjalo, uthe uhulumende wakhe wenza konke akwenelisayo ukuvuselela umnotho.
“Ngiyakwazi ukuthi abanengi benu lithwele nzima. Ayisikho ukuthi angiwuboni umumo okhona. Ayisikho njalo ukuthi izikhalazo zenu angizizwa,” kutsho uMnangagwa.
“Ngiyathembisa ukuthi sizaqhubeka sidinga indlela zokuletha inguquko ezakwenza siphile kuhle kanye lezizukulwana zethu ezizayo.”