Inhlanganiso ekhankasela ukulondolozwa kwamalungelo oluntu emhlabeni jikelele, eyeHuman Rights Watch isisole uhulumende weZanu PF isithi uqhubeke ngokuncindezela abantu ngomnyaka odluleyo lanxa uMongameli Emmerson Mnangagwa ebethembise inguquko.
Embikweni ewethule ngoLwesithathu, iHuman Rights Watch iphe umzekeliso wokubulawa kwabantu abalitshumi lasikhombisa ngamasotsha lamapholisa ngoZibandlela isithi kuveze obala ukungazimiseli kukahulumende kundaba zokuhloniphi amalungelo.
Ithe njalo abantu baqhubeka bebotshwa mahlayana njalo bengavunyelwa ukukhuluma bekhululekilo, ikakhulu indaba eziphathelane lombusazwe.
Umgcinisihlalo webandla leMDC uNkosazana Thabitha Khumalo utshele iStudio 7 ukuthi ngempela uhulumende kawahloniphi amalungelo.
“UMnangagwa uvele uyawephula Amalungelo. Sikhuluma nje koBulawayo silabasekeli bethu abane abagoqela uMzaca abagwetshelwa icala lokuthi babangela udlakela nyakenye,” kutsho uNkosazana Khumalo.
“Abane laba sebesuswe eKhami bahanjiswa eChikurubi eHarare. Izihlobo zabo zonke zikoBulawayo. Akungitshele ukuthi izihlobo lezi zizafikelwa ngubani eHarare ukuyabanika ukudla. Yikwephula amalungelo lokhu.”
Kodwa ilunga leZanu PF uMnu Believe Gaule ukulandule lokhu esithi iHuman Rights Watch yinhlanganiso esetshenziswa yizitha zeZimbabwe ukuphehla ukungahlaliseki.
“Amazi la anje ngawabantu abangathandi ilizwe lethu. Ngawezitha zabantu. Akulalizwe elingela mithetho yalo. UMnangagwa ulethe umbuzo okhululekileyo eZimbabwe njalo abantu bakhululekile,” kutsho uMnu Gaule.