Abotsheketsha begolide abalobudlwangudlwangu besazakala ngelokuthi ngaMashurugwi babikwa sebefinyelele emadolobheni afana lako Bulawayo lase Harare lapho abenza umkhuba wabo wokuhlukuluza uzulu.
NgoLwesine babikwa behlasele omunye usomabhizimusi othengisa igolide elokitshini le Codwray Park koBulawayo, bamlimaza qede bamthathela impahla yakhe.
Asenelisanga ukukhuluma lamapholisa kumbe abangafakaza ngaloludaba, kodwa sisadingisisa imininingwane.
EHarare babikwa behlasele imizi ye Kambuzuma le Lochinvar kuyonale iviki.
Kulomfanekiso kamabonakude osusabelele enkundleni zokuxhumana ebulenjini otshengisa aMashurugwi la ehlome ngenkemba, amahloka lezinqamu omunye ephethe isiquma segolide bejabula benatha utshwala bememeza besazisa uzulu ukuthi yibo ababusayo njalo bazakubabekhona ngomnyaka ka 2030.
USithandekile Mhlanga weStudio Seven uxoxe lelunga ledale lephalamende emela iSoutherton, ebalisa iLochinvar esike yahlaselwa ngaMashurugwi la ukuze sizwe okunengi ngaloludaba.
