Inkokheli kahulumende weBhilithani izahlangana lenkokheli yamazwe eseAfrica namuhla bekhulumisana ngobudlelwano kwezamabhizimusi emhlanganweni weUK-Africa Investment Summit 2020.
Kodwa uMongameli Emmerson Mnangagwa kasoze abekhona kulumhlangano ngoba eleZimbabwe kalinxuswanga.
Ugatsha olubona ngobudlelwano beZimbabwe lamanye amazwe luthi ukutshiywa phandle lokhu akutsho ukuthi kukhona okusolwa nguhulumende weBhilithani.
Kodwa ibandla leMDC elikhokhelwa nguMnu Nelson Chamisa lithi lokhu kuveza usobala kuthi eleBhilithani liphatheke kabi ngodaba lokwephulwa kwamalungelo oluntu nguhulumende kaMongameli Emmerson Mnangagwa.
“Kuvesa sobala ukuthi kabajabuli ngendaba zamalungelo,” kutsho isikhulumeli sikaChamisa uDr. Nkululeko Sibanda.
“Lumhlangano ubulithuba elikhulu kakhulu elokuthi kubekhona amabhizimusi asuka kweleBhilithani esiza elizweni eliding amabhizimusi njengeleZimbabwe.”
Khepha ilunga leZanu PF uMnu Believe Gaule utshele iStudio 7 ukuthi ukutshiywa phandle kukaMnangagwa lokhu kuveza ukuthi eleBhilithani kalifuni kubona eleZimbabwe liphumelela.
“Amazwe la afana laboAmerica laboBritain awasithakazeleli. Alokhe esilwa kusukela khonaphana kuthathwa umhlaba,” kutsho uMnu Gaule.