Ukuthoniswa kukamongameli weleMelika, uMnu. Donald Trump kuqhubekele phambili namuhla ngemva kwelanga lakuqala lapho okube sobala ukuthi ibandla lika Trump, elama Republicans, liyamsekela.
Idale le Senate livote okulitshumi lanye lidinga ukuvumelana ukuthi kulethwe abafakazi lamaphepha avela kunhlangothi zikahulumende atshengisa ukuthi uTrump wayefuna ukufumbathisa uMongameli Volodymyr Zelensky wakwele Ukraine ngoncedo oluvela kuhulumende weleMelika.
UTrump wetheswa icala lokuzama ukubamba uZelensky ngamandla oncedo lolu ukuthi azise umhlaba jikelele ukuthi omunye wabafuna ukuncintisana loTrump kukhetho lukaMongameli olwenziwa ekupheleni komnyaka, uMnu. Joe Biden wasebenzisa amandla akhe ukudingela umsebenzi indodana yakhe uHunter Biden.
UTrump wetheswa amacala amabili: elokusebenzisa amandla ache ngokungekho emthethweni lokwenqabela idale lecongress ukuthi lenze umsebenzi walo.
Amalunga ebandla lama Republicans angama senetha avimbe ukulethwa kobufakazi labafazi.
Kodwa amalunga ama Democrats athi nxa kungalethwanga abafakazi uTrump engaxotshwanga emsebenzini kuzabangela ukuthi abanye abayabe bekhethwe ukuba ngomongameli benze okufanayo.
Ukuhlaziya loludaba uChris Gande weStudio Seven uxoxe lesizalwane seZimbabwe esihlala ngapha kweleMelika, uMnu. Raphael Mthombeni.
