EleMelika ngoLwesibili litshele umanyano weSADC ukuthi umnotho weZimbabwe awubulawa yizijeziso elazifakela iziphathamandla zeZanu PF kodwa ubhidlizwa yikwephulwa kwamalungelo oluntu lombuso kahulumende omubi.
Umeli weMelika eBotswana uMnu Craig Lewis Cloud wethule amazwi la kunobhala jikelele weSADC uDr. Stergomena Lawrence Tax emhlanganweni abawenzele eGaborone.
Isigodlo seMelika sithi uAmbassador Cloud uchasisele uDr. Tax ukuthi izijeziso zeMelika ziphatha amalunga eZanu PF edlula ikhulu kuphela kanye lamankampani alobudlelwano lalelibandla.
Ngokunjalo uthe izijeziso lezi kazilani lokutshabalala komnotho weZimbabwe.
Wengeze wathi eleMelika liqhubeka liphathisa eleZimbabwe ngenhlelo zentuthuko lokuthi kusukela ngo1980, ilizwe lakhe seliphathise eleZimbabwe ngemali efika kuUS$3 billion.
Lanxa singenelisanga ukuzwa icele likaDr. Tax ngomhlangano lo, yinto eyazakalayo ukuthi uhlezi echothoza izijeziso lezi esithi kumele zesulwe.
“Umhlaba wonke jikelele usukunanzelela ukuthi udaba lweZimbabwe lungaphi. Ngiyathemba ukuthi lezizalwane zeSADC lazo sezikubona,” kutsho uDr Nkululeko Sibanda, isikhulumeli somkhokheli weMDC uMnu Nelson Chamisa.
Kodwa umsekeli kamphathintambo obona ngokuhanjiswa kwemibiko ngemitshina yakulezinsuku njalo elilunga leZanu PF uMnu Dingumuzi Phuti uthi izijeziso yizo ezibulala umnotho welizwe, ngakho kumele zesulwe.
