amalinks wokungena

Breaking News

Igcikwane leCoronavirus Alikafiki eZimbabwe Kodwa Abalikhulu Abake Bafika Kwele China Babhekiwe Okwamaviki Amabili


Egcekeni lendizamtshina kwele Maynmar kuhlolwa umkhuhlane we coronavirus.

Uhulumende uthi usekusimo sokulimuka ingozi engaqhamuka kulandela ukubulawa kwabantu abedlula amakhula amabili ngumkhuhlane we coronavirus.

Omela inhlanganiso ebona ngezempilakahle emhlabeni jikelele eye World Health Organization (WHO) eZimbabwe, uDokotela Alex Gasarira uthi eZimbabwe abantu abalikhulu lamatshumi amabili bafakwe kusimo sokuhlolisiswa ngoba beke bafika kwele China kunsukwana ezisanda kwedlula.

UGasarira uthi abantu laba abalampawu zalumkhuhlane othelelwana lula ngesikhwehlelo, iziginqo kumbe umphefumulo, kodwa bazahlolisiswa okwamaviki amabili alandelayo.

Uhulumende we Zimbabwe usethumele uhulumende wakwele China umlayezelo wokuncoma ele China ngokulwisana lomkhuhlane lo.

Umphathitnambo wezembiko, uNkosikazi Monica Mtsvangwa uthe ilizwe le Zimbabwe lizimisele ukuphathisa ele China.

Inhlanganiso ye WHO yethule isinqumo ngoLwesine ntambama esokuthi igcikwane leli ele coronavirus ludubo okufanele luqatshelwe ngamazwe wonke ngesiphange-phange, i-global health emergency.

Umuntu osehlaselwe yileligcikwane ubonakala ngokuvimbana, ukukhwehlela lokugcwalelana.

Lumkhuhlane ubikwa uqhamuke edolobheni le Wuhan kwele China ubangelwa yikudla izinanakazana ezifana labomalulwane.

UChris Gande we Studio Seven uxoxe lesizalwane se Zimbabwe esihlala edolobheni le Shanghai kwele China, uNkosazana Nomalanga Ndebele ukuze sizwe ukuthi kunjani khonale.

please wait

No media source currently available

0:00 0:02:04 0:00


XS
SM
MD
LG