UMongamei Emmerson Mnangagwa utshele abamasonto ngoMgqibelo ukuthi uhulumende wakhe uphakathi kokulwisana lenkohlakalo njalo wenza konke akwenelisayo ukuvuselela umnotho welizwe.
Ekhuluma emkhosini wokukhulekela ilizwe enkundleni yeNational Sports, uMnangagwa ucele abamasonto laba ukuthi beqhubeke bekhulekela impumelelo kanye lokuthula.
“Siqhubeka sidinga ukuqondiswa enkonzweni. Uhulumende wami uzaqinisa indlela zokulwisana lemikhakha yonke yenkohlakalo lokuqeda udlakela elizweni,” kutsho uMnangagwa.
“Kumele sikhulekele ukuphumelela komnotho wethu lokuthula okunaphakade. Singahlangana lobunzima kodwa kumele sihlale sikwazi ukuthi umdali ujonge ukusiphumelelisa, hatshi ukusilimaza.
“Ngatsho ukuthi u2020 ngumnyaka wokuvuselela umnotho wethu. Ngicela njengabakhokheli bamasonto likhuthaze abazalwane ukuthi basebenze kanzima,” uqhubeke esitsho uMnangagwa.
Abamasonto abaqoqe lumbuthano bagoqela uMnu Andrew Wutawunashe oweFamily of God njalo ngabantu abazakalayo ukuthi balobudlelwano obuhle lebandla leZanu PF.
Umkhokheli webandla eliphikisayo eleMDC uMnu Nelson Chamisa ubenganxuswanga kulumbuthano.
Isikhulumeli sakhe uDr. Nkululeko Sibanda utshele umsakazo weStudio 7 ukuthi uMnangagwa ukhohlisa abantu ngokuthi uhulumende wakhe ulwisana lenkohlakalo.
“Uzulu uyakwazi ukuthi abantu ababotshwayo ngamacala enkohlakalo baphange bakhululwe kungenziwa lutho. Ngakho uMnangagwa kakwazi ukukhuluma ngokulwisana lenkohlakalo elizweni,” kutsho uDr. Sibanda.
