Ukuqanjwa komcebisi kaMongameli Emmerson Mnangagwa, uMnu Kudakwashe Tagwirei, njengomunye wengqungquthela zemkhuba yenkohlakalo elizweni sokudale ukuthi abanye banakanele ukuthi kungaba sokulokulwisana kubandla leZanu PF okufana lalokho okwandulela ukugenqulwa embusweni kukaMnu Robert Mugabe libutho ngo2017.
Inkokheli yabasakhulayo beZanu PF, uMnu Lewis Matutu loMnu Godfrey Tsenengamu batshele intatheli eHarare izolo ukuthi uTagwirwei, umkhokheli wenhlanganiso yeGrain Millers Association uMnu Tafadzwa Musarara kanye loMnu Billy Rautenbach ngabanye babantu ababulala umnotho weZimbabwe ngemisebenzi yenkohlakalo.
Bathe kumele babotshwe. Lanxa uTagwirei engomunye wabacebisi bakaMnangagwa, ubikwa engumngane kaMnu Consntantino Chiwenga ongumsekeli kaMongameli.
Ngokunjalo, abanye bathi ukuqanjwa kukaTagwirei lokhu kuveza ukungezwani lokulwisana okungaba sokukhona phakathi kukaMnangagwa loChiwenga.
Ukunukwa kwabathakathi yinto eyayivamile kakhulu kuZanu PF ngesikhathi sikaMugabe lapho okwakulokulwisana okukhulu phakathi kwecele likaMugabe eleG40, elikaMnangagwa eleTeam Lacoste kanye lelalisekela uNkosikazi Joice Mujuru.
Icele leG40 yilo elalisebenzisa abasakhulayo ukugcona inkokheli yebandla ngokuthi izama ukugenqula uMugabe.
Esikhathini esinengi owayethe wagconwa ngabasakhulayo laba wayexotsha kubandla.
Ingcwthi ecubungula ezombusazwe uMnu Dinizulu Macaphulana utshele uNtungamili Nkomo weStudio Seven ukuthi okwenzakale izolo kuveza sobala ukuthi into azisamanga kuhle phakathi kukaMnangagwa loChiwenga.
