Uhulumende sexwayise uzulu weZimbabwe ongaba ejonge ukwethekelela kweleChina ukuthi amise inhambo zakhe ukuze enqabele ukubamba igciwane leCoronavirus, lona eselibulele abantu abafika phose kumakhulu amane lamatshumi amathathu, 427, eChina.
Embikweni oluwethule ngoLwesibili ugatsha lwezempilakahle luthe abalengwendo ezingaphuthumiyo kumele bame kancane ngazo imizamo yokulwisa leligciwane eChina ize iphumelele.
Ugatsha lolu lwazise njalo ukuthi inani labantu abahlolwa leligciwane nguhulumende ngoba beye emazweni elihlasele khona, seliqonge lisuka kumakhulu amabili lamatshumi amabili, 221, laya kumakhulu amabili lamatshumi edlula ayisithupha, 266.
Abezempilakahle laba bathembise njalo uzulu ukuthi uhulumende uzilungiselele ngokugcweleyo ukulwisa igciwane leli alubana kuthe kwatholakala olalo elizweni.
Kodwa abanye bathi umumo osezibhedlela wenza bethuke ngoba kukunengi okusilelayo okwenza izibhedlela zehluleke ukwelapha imikhuhlane elapheka kalula kulegciwane leCorona.
“Siyethuka lapha sivele sibambe inkamanzi ngoba izibhedlela zethu akualutho oluhambayo,” kutsho ilunga ledale lephalamende uNkosazana Thabitha Khumalo.
