amalinks wokungena

Breaking News

Ubuyanga Sobehlile eMelika Ngenxa Yombuso Wami, Kutsho uTrump Ezitshaya Isifuba Kumbiko Wakhe Omqoka


UMongameli weMelika uMnu Donald Trump wethule umbiko ophathelane lesimo selizwe lakhe oweState of the Union Address namuhla lapho azitshaye khona isifuba esithi phansi kombuso wakhe uzulu sephila ngcono ngoba esesungule imisebenzi eminengi ebangele ukwehla kobuyanga.

Njengenhlalayenza, uMongameli Trump wethule umbiko wakhe phambi kwamalunga edale lephalamende, eleCongress labanye abahloniphekayo ekade benxusiwe.

UTrump uqale ngokuzincoma esithi eminyakeni emithathu esembusweni usevuselele umnotho wahlenga abantu abanengi phakathi kobuyanga njalo wasungula imisebenzi athi yayidilizwe nguhulumende kaMongameli Barack Obama.

“Eminyakeni emithathu edluleyo sasungula inhlelo zokuvuselela ilizwe lethu. Namuhla ngizelethulela impumela,” kutsho uTrump.

“Imisebenzi iyanda, imiholo yabantu iyakhuphuka, ukuyanga buyehla, ubugebengu labo buyehla njalo ilizwe lethu selihlonitshwa njengakudala.”

UMongameli Trump wengeze wathi inani labansundu kanye labohlobo lwesiHispanic elingasebenziyo eMelika selehlile ngesilinganiso esikhulu ngenxa yenhlelo zikahulumende wakhe.

Ekhuluma ngezempilakahle, uTrump uthe uhulumende wakhe uzaqhubeka elwela ukuthi uzulu afinyelele inhlelo zokwelatshwa ngembadalo ephansi. Ucele njalo amalunga edale lephalamende ukuthi athule umthetho oyehlisa intengo yamaphilisi ngoba edula kakhulu.

“Ngikhuthaza amalunga edale lephalamende ukuthi aphume lomthetho ozakwehlisa intengo yamaphilisi. Liwulethe kimi ngiwusayine ngokuphangisa,” kutsho uTrump waqakezelwa kakhulu ngabebandla lakhe lamaRepublicans.

Elokhe ekudaba lwezempilakahle, uTrump uthembise izizalwane zeMelika ukuthi uhulumende usebenza gadalala ukwenqabela igciwane leCoronavirus lona eselibulele abantu abaphose bafike amakhulu amahlanu kweleChina.

Bakhona abahlaselwe ligciwane leli eMelika abalaliswe ezibhedlela. UMnu Trump wengeze wathi uhlumende wakhe ulenjongo zokuqeda njalo igciwane elibangela umkhuhlane wengculazi eleHIV eMelika eminyakeni elitshumi elandelayo.

UMongamel iTrump usole njalo abantu abangena eMelika ngaphandle komthetho esithi abanye babo yizigebengu ezidala amacala agoqela awokubulala.

Ngokunjalo, uthe uhulumende wakhe uzaqhubeka eqinisa imithetho elawula ukungena kwabokuza eMelika okugoqela ukwakha umduli emhlubulweni welizwe ongcelelane leMexico.

“Kunsukwana ezedluleyo kulesigebengu esasikhululwe lidolobho leNew York esabotshwa setheswa icala lokudlwengula lokubulala ugogo owayeleminyaka engu92. Saqala sabotshelwa elinye njalo icala. Asisoze sikuvumele lokhu.”

Banengi abadabuka eZimbabwe abahlala khonapha eMelika ababukele umbiko kaTrump. Omunye wabo nguMnu Garry Thwala Jackson, ohlala edolobheni leTexas.

UThwala uchothoze uMongameli Trump ngokusola abokuza kuphela esithi kulezizalwane zeMelika ezilobudlova obedlula amacala adalwa yizizalwane zakwamanye amazwe.

“Edolobheni leTexas khonapha kulabantu abedlula abahlanu ababulawe yizizalwane zeMelika. Kodwa kazange akhulume ngakho lokho,” kutsho uMnu Jackson.

Omunye njalo obebukele nguMnu Dan Moyo yena ocubungula ezombusazwe.

“Esikubonileyo yikuthi uTrump ube-campaigner. Yinto yakhe vele ukuthi nxa e-campaigner sambona lango2016 uqala ngokuhlasela ama-immigrants,” kutsho uMoyo ekhuluma leStudio 7.

Abebandla eliphikisayo elamaDemocrats labo bethule umbiko wabo bephikisa okukhulunywe nguMongameli Trump.

Oyethule lumbiko usibalukhulu wesabelo seMichigan uNkosikazi Gretchen Whitmer uthe lanxa uTrump esithi uhulumende wakhe usungule imisebenzi, banengi abantu abadubekayo eMelika abangelayo leyo misebenzi.

UTrump kazange akhulume lutho ngezwekazi leAfrica. Kazange njalo ayilokothe indaba yokuthonisiswa kwakhe ngamacala agoqela elokudinga ukungenela kweleUkraine kwezombusazwe weMelika lelokuvimba isandla seCongress ngesikhathi iphenya lelicala.

Idale leCongress likhangelelwe ukwethula isinqumo limgeza uTrump namuhla ngoba evikelwe ngabebandla lakhe elamaRepublicans bona abale ukuthi kubizwe abafakazi.

please wait

No media source currently available

0:00 0:07:42 0:00

XS
SM
MD
LG