WASHINGTON DC —
Inhlanganiso yeProgressive Teachers Union of Zimbabwe ithi ababalisi sebezahamba emsebenzini bengagqokanga impahla abaphoqelelwa ukuthi bayigqoke nguhulumende ngoba kabala mali yokuyithenga.
Ababalisi besilisa kumele bavunule amabhulugwe agqokwa ngabantu abasebenza emahofisini, amayembe kanye lamabhatshi nxa belawo.
Abesifazana labo kumele bagqoke izembatho ezibenza bahlonipheke phambi kwabafundi. Amajini lamateki awavunyelwa.
Kodwa iPTUZ ithi njengoba ababalisi bengelayo imali yokuthenga lezimpahla, sebezagqoka yiloba yini okuvimba ubunqunu babo.
“Khathesi kunje mina ngingumama angisenelisi ukuthi ngingene koEdgars ngithenge impahla ngoba iholo lami liphansi,” kutsho isiphathamandla sePTUZ uNkosikazi Nokuthula Hlabangana.
